Luke 22

UJudasi Uvuma Ukunikela UJesu

1Ngalesi isikhathi iDili leSinkwa esingelaMvubelo elalibizwa ngokuthi liPhasika laselisondela, 2njalo abaphristi abakhulu labafundisi bomthetho babedinga enye indlela yokumsusa uJesu, ngokuba babesesaba abantu.

3USathane wasengena kuJudasi owayethiwa ngu-Iskariyothi, omunye wabali-Tshumi lambili.

4UJudasi waya kubaphristi abakhulu lezikhulu zabavikeli bethempeli wabonisana labo ukuthi amnikele njani uJesu. 5Bathaba bafa basebevuma ukumupha imali.

6Wavuma, wasemelela ithuba lokunikela uJesu kubo ngesikhathi kungelaxuku labantu.

Isidlo Sokucina

7Lwaselufika usuku lweSinkwa esingela-Mvubelo okwakusenziwa ngalo umhlatshelo wezinyane lePhasika. 8UJesu wathuma oPhethro loJohane wathi, “Hambani liyosilungisela ukuthi siyokudla iPhasika.”

9Babuza bathi, “Ufuna siyolilungisela ngaphi?”

10Waphendula wathi, “Lizakuthi nje lingena edolobheni lizahlangabezwa yindoda iphethe isikali samanzi. Ilandeleni kuleyondlu ezangena kuyo, 11libe selisithi kumninindlu, ‘Umfundisi uyabuza uthi: Ingaphi indlu yezihambi, lapho engingadlela khona iPhasika labafundi bami na?’

12Uzalitshengisa ikamelo elikhulu eliphezulu elilungisiweyo ngezihlalo. Yenzani khonapho amalungiselo.”

13Bahamba bayafica izinto zimi njengokutshelwa kwabo nguJesu. Ngakho balilungisa iPhasika.

14Kwathi isikhathi sesifikile uJesu wahlala etafuleni labaphostoli bakhe.

15Yikho wasesithi kubo, “Bengitshiseka kakhulu ukudla leli iPhasika lani ngingakahlupheki. 16Ngokuba ngiyalitshela ukuthi kangisoze ngiphinde ngilidle njalo lize lizuze ukugcwaliseka embusweni kaNkulunkulu.”

17Esethethe inkomitshi wabonga wasesithi, “Kuthatheni lokhu likwabelane. 18Ngokuba ngiyalitshela ukuthi angiyikulinatha futhi iwayini levini umbuso kaNkulunkulu uze ufike.”

19Wasethatha isinkwa, wabonga wasesihlephula wabapha, wathi, “Lo ngumzimba wami ophiwe lina; kwenzeni lokhu kube yisikhumbuzo sami.”

20Ngaleyondlela, ngemva kokudla kwakusihlwa wathatha inkomitshi, wathi, “Inkomitshi le iyisivumelwano esitsha egazini lami elichithelwa lina. 21Kodwa isandla sakhe lowo ozanginikela sikanye lesami etafuleni.

22INdodana yoMuntu izahamba njengoba kumisiwe, kodwa maye kulowomuntu oyinikelayo.” 23Baqala ukubuzana ukuthi kambe ngabe ngubani kubo owayezakwenza lokhu.

24Njalo kwaba lokuphikisana phakathi kwabo mayelana lokuthi ngubani kubo owayebonakala emkhulu kulabo bonke. 25UJesu wathi kubo, “Amakhosi abeZizwe azitshengisela amandla awo kulabo ababusayo; leziphathamandla zakhona zibizwa ngokuthi Mcoli. 26Kodwa kalimelanga libe njalo. Endaweni yalokho lowo ongomkhulu kulani lonke kabe kungathi ngongumntwana kini lonke, lalowo obusayo abe nguye okhonza abanye.

27Ngoba ngubani omkhulu kulomunye, lowo ohleziyo etafuleni yokudla langabe lowo odekayo na? Kakusilowo osetafuleni na? Kodwa mina ngiphakathi kwenu njengalowo olidekelayo.

28Liyilabo abame lami ebunzimeni bami.

29Ngakho ngiyalinika umbuso njengoba uBaba wanginika omunye lami, 30ukuze lidle njalo linathe etafuleni lami embusweni wami njalo lihlale ezihlalweni zobukhosi, lisahlulela izizwana zika-Israyeli ezilitshumi lambili.

31“Simoni, Simoni uSathane usecele ukulihlungula lonke njengengqoloyi.

32Kodwa sengikukhulekele wena, Simoni, ukuthi ukholo lwakho lungehluleki. Akubokuthi nxa usubuyile kimi uqinise abafowenu.”

33Kodwa waphendula wathi, “Nkosi, ngizimisele ukuhamba lawe entolongweni lasekufeni.”

34UJesu waphendula wathi, “Ngiyakutshela, Phethro, ukuthi iqhude lingakakhali lamuhla, uzaphika kathathu ukuthi uyangazi.”

35UJesu wasebabuza wathi, “Ngize ngilithume lingelasikhwama semali, loba umgodla kumbe amanyathelo, kukhona yini elake lakusilela na?” Baphendula bathi, “Akubanga lalutho.”

36Wathi, kubo, “Kodwa manje nxa ulesikhwama semali, sithathe, kanye lomgodla; njalo nxa ungelankemba, thengisa isigqoko sakho uyithenge. 37Kubhaliwe ukuthi, ‘Wabalwa ndawonye lezoni;’ njalo ngiyalitshela ukuthi lokhu kumele kugcwaliseke kimi. Yebo, lokho okubhaliweyo ngami sekufika ekugcwalisweni kwakho.”

38Abafundi bathi, “Khangela, Nkosi, nanzi izinkemba ezimbili.” Waphendula uJesu wathi, “Kwanele.”

UJesu ukhuleka ENtabeni Yama-Oliva

39UJesu wahamba njengenjayelo waya eNtabeni yama-Oliva, abafundi bakhe bamlandela. 40Esefikile kuleyondawo, wathi kubo, “Khulekani ukuze lingaweli ekulingweni.”

41Wasuduka kubo okwebanga lokuphosa ilitshe, waguqa phansi wakhuleka wathi, 42“Baba, uma uthanda susa inkomitshi le kimi; kodwa akungabi ngeyami intando, kodwa kwenziwe eyakho.” 43Ingilosi yabonakala kuye ivela ezulwini yamqinisa. 44Kwathi edabukile kakhulu, wakhuleka ngokutshiseka, izithukuthuku zakhe zangathi ligazi lithontela phansi.

45Wathi esephakeme ekukhulekeni wabuyela kubafundi bakhe wabafica belele, bekhathele ngenxa yosizi.

46Wababuza wathi, “Kungani lilele na? Vukani likhuleke ukuze lingaweli ekulingweni.”

UJesu Uyabotshwa

47Kwathi elokhu esakhuluma kwafika ixuku labantu, indoda ethiwa nguJudasi omunye wabalitshumi lambili, wayebahola. Wasondela kuJesu ukumanga, 48kodwa uJesu wambuza wathi, “Judasi, uyayinikela na iNdodana yoMuntu ngokuyanga?”

49Kwathi abalandeli bakaJesu sebebona okwase kuzakwenzeka bathi, “Nkosi, sigalele yini ngezinkemba zethu?” 50Omunye wabo wayigalela inceku yomphristi ophezulu, wayiquma indlebe yayo yokunene.

51Kodwa uJesu waphendula wathi, “Kakufuneki lokhu!” Waseyibamba indlebe yalowomuntu wamsilisa.

52UJesu wasesithi kubaphristi abakhulu, lezikhulu zabalindi bethempeli kanye labadala ababemlandile, “Ngikhokhela umvukela yini lize liphethe izinkemba lezinduku? 53Zonke izinsuku bengilani emagumeni ethempeli, kodwa kalizange lingithinte. Kodwa lesi yisikhathi senu – lapho kubusa umnyama.”

UPhethro Ulandula UJesu

54Bamdumela, base bemusa endlini yomphristi ophezulu. UPhethro walandela ebucwala. 55Kodwa kwathi sebebase umlilo phakathi kweguma bahlala phansi ndawonye, uPhethro wahlala phansi labo. 56Intombazana eyisisebenzi yambona ehlezi khonapho ekukhanyeni komlilo. Yamkhangelisisa yathi, “Indoda le yayilaye.”

57Kodwa yena waphika wathi, “Ntombazana, kangimazi.”

58Ngemuva kwesikhatshana omunye wambona wathi, “Lawe ungomunye wabo.” UPhethro waphendula wathi, “Yeyi ndoda, angisuye.’ ”

59Sekudlule phose ihora omunye wagcizelela wathi, “Ngeqiniso umuntu lo waye laye, ngoba ungumGalile.”

60Waphendula uPhethro wathi, “Yeyi ndoda, angikwazi ukuthi ukhuluma ngani!” Elokhu esakhuluma iqhude lakhala. 61INkosi yaphenduka yamkhangela nta uPhethro. UPhethro waselikhumbula ilizwi iNkosi eyayilikhulumile kuye isithi: “Iqhude lingakakhali lamuhla, uzangiphika kathathu.” 62Yikho wasephumela ngaphandle wakhala kabuhlungu.

Amabutho Ahoza UJesu

63Amadoda ayelinde uJesu aqalisa ukumhoza lokumtshaya.

64Bamvala amehlo bathi kuye, “Phrofitha! Ngubani okutshayileyo na?” 65Batsho ezinye izigcono ezinengi kuye.

UJesu Phambi KukaPhilathu LoHerodi

66Emadabukakusa inkundla yabadala babantu, kanye labaphristi abakhulu labafundisi bomthetho yahlangana ndawonye, uJesu walethwa phambi kwabo. 67Bathi, “Uma unguKhristu sitshele.” UJesu waphendula wathi, “Ngingaze ngilitshele kalisoze lingikholwe, 68njalo uma bengingalibuza belingeke liphendule. 69Kodwa kusukela khathesi iNdodana yoMuntu izahlala kwesokunene sikaNkulunkulu olamandla amakhulu.”

70Bonke babuza bathi, “Kutsho ukuthi-ke uyiNdodana kaNkulunkulu na?” Waphendula wathi, “Liqondile ukuthi ngiyiyo.”

71Basebesithi, “Sisabudingelani obunye ubufakazi na? Sesikuzwe kuphuma kowakhe umlomo.”